ഇട്ടിമാണിക്ക് ശേഷം മോഹന്‍ലാല്‍ നായകനായെത്തുന്ന ചിത്രം ‘ബിഗ് ബ്രദറി’ന്റെ റിലീസ് നീട്ടിയതായി റിപ്പോര്‍ട്ട്.
സിദ്ദിഖ് സംവിധാനം ചെയ്യുന്ന ചിത്രം ക്രിസ്മസ് റിലീസായി തീയേറ്ററുകളില്‍ എത്തുമെന്നാണ് കരുതിയിരുന്നത്, ചിത്രത്തിന്റെ നേരത്തേ പുറത്തെത്തിയ പോസ്റ്ററിലും ‘ഡിസംബര്‍ 2019’ എന്നാണ് ഉണ്ടായിരുന്നത്. എന്നാല്‍ ചിത്രം ക്രിസ്മസിന് എത്തില്ലെന്നും റിലീസ് അടുത്ത വര്‍ഷം ജനുവരിയിലേക്ക് നീട്ടിയതായാണ് റിപ്പോര്‍ട്ട്.
ചിത്രത്തിന്റെ ഫൈനല്‍ ഷെഡ്യൂള്‍ എറണാകുളത്ത് പുരോഗമിക്കുകയാണ്. ‘ബിഗ് ബ്രദര്‍’ എന്ന പേരല്ലാതെ സിനിമയുടെ പ്രമേയത്തെക്കുറിച്ചോ മോഹന്‍ലാലിന്റെ കഥാപാത്രത്തെക്കുറിച്ചോ വിശദാംശങ്ങളൊന്നും ഇതുവരെ പുറത്തുവന്നിട്ടില്ല. 25 കോടിയാണ് ചിത്രത്തിന്റെ ബജറ്റ്. അവധിക്കാലം ചെലവിടാന്‍ ന്യൂസിലന്‍ഡില്‍ പോയിരിക്കുന്ന മോഹന്‍ലാല്‍ ചിത്രത്തില്‍ വൈകാതെ ജോയിന്‍ ചെയ്യും.
മോഹന്‍ലാലിനൊപ്പം ബോളിവുഡ് താരം അര്‍ബാസ് ഖാന്‍, റജീന, സത്ന ടൈറ്റസ്, സിദ്ദിഖ്, വിഷ്ണു ഉണ്ണികൃഷ്ണന്‍, അനൂപ് മേനോന്‍, ചെമ്പന്‍ വിനോദ് ജോസ്, ടിനി ടോം, സര്‍ജാനോ ഖാലിദ് എന്നിവര്‍ കഥാപാത്രങ്ങളെ അവതരിപ്പിക്കും. മോഹന്‍ലാല്‍-സിദ്ദിഖ് കൂട്ടുകെട്ടില്‍ പുറത്തിറങ്ങുന്ന മൂന്നാമത്തെ ചിത്രമാവും ബിഗ് ബ്രദര്‍. സിദ്ദിഖ്ലാല്‍ ചിത്രം വിയറ്റ്നാം കോളനിയിലാണ് തുടക്കം. സിദ്ദിഖ് സ്വതന്ത്ര സംവിധായകന്‍ ആയതിന് ശേഷം ലേഡീസ് ആന്‍ഡ് ജെന്റില്‍മാനും ഈ ടീമിന്റേതായി പുറത്തിറങ്ങി.