വിജയ്‌യുടെ സത്യപ്രതിജ്ഞാ ചടങ്ങിൽ തിളങ്ങി തൃഷ; ചിത്രങ്ങൾ വൈറൽ

തമിഴ്‌നാടിന്റെ പുതിയ മുഖ്യമന്ത്രിയായി ദളപതി വിജയ് സത്യപ്രതിജ്ഞ ചെയ്ത് അധികാരമേറ്റപ്പോൾ, ചടങ്ങിൽ ഏവരുടെയും ശ്രദ്ധാകേന്ദ്രമായി നടി തൃഷ. ചെന്നൈയിലെ ജവഹർലാൽ നെഹ്‌റു സ്റ്റേഡിയത്തിൽ നടന്ന പ്രൗഢഗംഭീരമായ ചടങ്ങിലാണ് പരമ്പരാഗത ശൈലിയിൽ അതിസുന്ദരിയായി തൃഷയെത്തിയത്. സത്യപ്രതിജ്ഞാ ചടങ്ങിലെ താരത്തിന്റെ ദൃശ്യങ്ങൾ ഇപ്പോൾ സോഷ്യൽ മീഡിയയിൽ വൈറലാണ്.

ഇളംനീല (അക്വാ ബ്ലൂ) നിറത്തിലുള്ള പട്ടുസാരിയും സ്വർണവർണത്തിലുള്ള ബ്ലൗസുമായിരുന്നു തൃഷയുടെ വേഷം. മുടിയിൽ മുല്ലപ്പൂമാലയും ചുവന്ന കല്ലുകൾ പതിച്ച നെക്ക്‌ലേസും അതിന് അനുയോജ്യമായ കമ്മലുകളും അണിഞ്ഞ് തികച്ചും പരമ്പരാഗതമായ ലുക്കിലാണ് താരം വേദിയിലെത്തിയത്. കൈയിലെ സ്വർണവളകളും വിരലിലെ മോതിരവുമായിരുന്നു മറ്റ് ആഭരണങ്ങൾ. ചെന്നൈയിലെ വീട്ടിൽ നിന്ന് സത്യപ്രതിജ്ഞാവേദിയിലേക്ക് പുറപ്പെടുന്നതിന് മുമ്പ്, ഈ ചരിത്രനിമിഷത്തിനായി താൻ ഏറെ ആകാംക്ഷയോടെ കാത്തിരിക്കുകയാണെന്ന് തൃഷ മാധ്യമങ്ങളോട് പറഞ്ഞിരുന്നു.

നേരത്തേ, തിരഞ്ഞെടുപ്പ് ഫലം പുറത്തുവന്ന ദിവസം തൃഷ തിരുപ്പതി ക്ഷേത്രം സന്ദർശിച്ചത് വലിയ ചർച്ചയായിരുന്നു. തന്റെ 43-ാം ജന്മദിനത്തോടനുബന്ധിച്ചാണ് താരം തിരുപ്പതി ദർശനം നടത്തിയതെങ്കിലും, വിജയ്‌യുടേയും അദ്ദേഹത്തിന്റെ പാർട്ടിയായ തമിഴക വെട്രി കഴകത്തിന്റേയും (ടിവികെ) വിജയത്തിനായി പ്രാർഥിക്കാനാണ് തൃഷ ക്ഷേത്രത്തിൽ പോയതെന്നായിരുന്നു അന്ന് പ്രചരിച്ച അഭ്യൂഹം. ഏപ്രിൽ 23-ന് വോട്ട് രേഖപ്പെടുത്തിയ ശേഷം ഗില്ലി എന്ന ചിത്രത്തിലെ ഗാനത്തിന്റെ പശ്ചാത്തലത്തിൽ തൃഷ പങ്കുവെച്ച പോസ്റ്റും വിജയ്ക്കുള്ള പിന്തുണയായിരുന്നുവെന്ന് ആരാധകർ ചൂണ്ടിക്കാണിച്ചിരുന്നു.

1960-കൾ മുതൽ തമിഴ്നാട് രാഷ്ട്രീയത്തെ അടക്കിവാഴുന്ന ഡിഎംകെ, എഐഎഡിഎംകെ എന്നീ കക്ഷികളെ പരാജയപ്പെടുത്തി 108 സീറ്റുകൾ നേടിയാണ് വിജയ്‌യുടെ പാർട്ടിയായ തമിഴക വെട്രി കഴകം തമിഴ്നാട്ടിൽ ചരിത്രവിജയം സ്വന്തമാക്കിയത്. സിനിമാറ്റിക്കായ ഈ സത്യപ്രതിജ്ഞാ ചടങ്ങിന് ഇരട്ടിമധുരം നൽകുന്നതായിരുന്നു തൃഷയുടെ സാന്നിധ്യം.

Trisha became the center of attention at the grand swearing-in ceremony of Thalapathy Vijay