“ഒറ്റയ്ക്ക് ജീവിച്ച് മടുത്തു, എനിക്കും മക്കൾക്കും ഒരു കൂട്ട് വേണം”: മനസ്സുതുറന്ന് രേണു സുധി

അന്തരിച്ച പ്രിയകലാകാരൻ കൊല്ലം സുധിയുടെ ഭാര്യ രേണു സുധി പുനർവിവാഹത്തെക്കുറിച്ചുള്ള തന്റെ ആഗ്രഹം തുറന്നുപറയുന്നു. ഇൻസ്റ്റാഗ്രാം സ്റ്റോറിയിലൂടെ പങ്കുവെച്ച വാക്കുകൾ സോഷ്യൽ മീഡിയയിൽ വൈറലാകുന്നു.

അന്തരിച്ച പ്രിയകലാകാരൻ കൊല്ലം സുധിയുടെ ഭാര്യ രേണു സുധി സോഷ്യൽ മീഡിയയിൽ പങ്കുവെച്ച പുതിയ പോസ്റ്റ് ശ്രദ്ധനേടുന്നു. തന്റെ ജീവിതത്തിൽ പുതിയൊരു കൂട്ട് വേണമെന്ന ആഗ്രഹമാണ് ഇൻസ്റ്റാഗ്രാം സ്റ്റോറിയിലൂടെ രേണു തുറന്നുപറഞ്ഞിരിക്കുന്നത്.

സുധിയുടെ അപ്രതീക്ഷിത വിയോഗത്തിന് ശേഷം സോഷ്യൽ മീഡിയയിലും അഭിനയരംഗത്തും സജീവമായ രേണുവിന് ആദ്യകാലങ്ങളിൽ വലിയ തോതിലുള്ള സൈബർ അറ്റാക്കുകളും ട്രോളുകളും നേരിടേണ്ടി വന്നിരുന്നു. എന്നാൽ ഈ വിമർശനങ്ങളെല്ലാം കാറ്റിൽപ്പറത്തി, പലതിനും ചുട്ടമറുപടി നൽകി ധൈര്യത്തോടെ മുന്നോട്ടുപോകുകയാണ് അവർ. ഇപ്പോഴിതാ, ഒറ്റയ്ക്കുള്ള ജീവിതം മടുത്തുവെന്നും ഒരു കൂട്ട് വേണമെന്നും അവർ മനസ്സ് തുറക്കുന്നു.

“ഒറ്റയ്ക്ക് ജീവിച്ച് മടുത്തു. എന്നെ മനസിലാക്കുന്ന, എന്നെ നോക്കുന്ന, എന്‍റെ മക്കളെ സ്നേഹിക്കുന്ന ഒരാളെ വേണം എന്ന് തോന്നി തുടങ്ങി. ഒരു കൂട്ട് വേണമെന്ന് മനസ് ആഗ്രഹിക്കുവാ,” എന്നാണ് ഇൻസ്റ്റാഗ്രാമിൽ രേണു കുറിച്ചിരിക്കുന്നത്. ഈ സ്ക്രീൻഷോട്ട് ഇതിനോടകം തന്നെ സോഷ്യൽ മീഡിയയിൽ വലിയ ചർച്ചയായിക്കഴിഞ്ഞു.

നേരത്തെയും ചില ഓൺലൈൻ മാധ്യമങ്ങൾക്ക് നൽകിയ അഭിമുഖങ്ങളിൽ വിവാഹത്തെക്കുറിച്ചുള്ള ചോദ്യങ്ങൾക്ക് രേണു മറുപടി നൽകിയിരുന്നു. തന്നെയും തന്റെ അവസ്ഥകളും പൂർണ്ണമായി മനസ്സിലാക്കുന്ന ഒരാൾ വന്നാൽ വിവാഹം കഴിക്കുന്നതിനെക്കുറിച്ച് ചിന്തിക്കും എന്നായിരുന്നു അന്ന് പറഞ്ഞിരുന്നത്. ആ ആഗ്രഹമാണ് ഇപ്പോൾ കൂടുതൽ വ്യക്തമായി അവർ പങ്കുവെച്ചിരിക്കുന്നത്.

രേണുവിന്റെ ഈ തുറന്നുപറച്ചിലിന് വലിയ പിന്തുണയാണ് സോഷ്യൽ മീഡിയയിൽ നിന്ന് ലഭിക്കുന്നത്. സുധിയുടെ മരണശേഷം മക്കളുടെയും തന്റെയും കാര്യങ്ങൾ ഒറ്റയ്ക്ക് നോക്കിനടത്തുന്ന രേണുവിന് അവരെ ചേർത്തുപിടിക്കുന്ന നല്ലൊരു ജീവിതപങ്കാളിയെ ലഭിക്കട്ടെ എന്നാണ് ആരാധകരും ആശംസിക്കുന്നത്.

Renu Sudhi open up about her second marriage