തൻ്റെ ജീവിതത്തിൽ നേരിടേണ്ടി വന്ന ലൈംഗികാതിക്രമങ്ങളെക്കുറിച്ച് തുറന്നുപറഞ്ഞ് നടി പാർവതി തിരുവോത്ത്. കുട്ടിക്കാലത്തും മുതിർന്നപ്പോഴും പൊതുയിടങ്ങളിൽ വെച്ച് നേരിട്ട ദുരനുഭവങ്ങളാണ് താരം പങ്കുവെച്ചത്.
ഒരു ലിഫ്റ്റിൽ വെച്ചുണ്ടായ അനുഭവം പാർവതി വെളിപ്പെടുത്തി. തന്നോട് അപമര്യാദയായി പെരുമാറാൻ ശ്രമിച്ചയാളെ അപ്പോൾ തന്നെ കരണത്തടിച്ചാണ് പ്രതികരിച്ചത്. എന്നാൽ, ഈ സംഭവത്തിൽ പോലീസിനെ സമീപിച്ചപ്പോൾ “നീ ഒരു തല്ല് കൊടുത്തല്ലോ, ഇനി ഇത് വിട്ടേക്ക്” എന്ന നിരുത്തരവാദപരമായ മറുപടിയാണ് ലഭിച്ചതെന്നും നടി പറഞ്ഞു.
ഇതിനുപുറമെ, കുട്ടിക്കാലത്ത് റെയിൽവേ സ്റ്റേഷനിൽ മാതാപിതാക്കൾക്കൊപ്പം നിൽക്കുമ്പോൾ ഒരാൾ വന്ന് തൻ്റെ മാറിടത്തിൽ ശക്തമായി അടിച്ചിട്ട് ഓടിപ്പോയ ഭയാനകമായ അനുഭവവും താരം പങ്കുവെച്ചു. അതൊരു സ്പർശനമായിരുന്നില്ല, മറിച്ച് വേദനിപ്പിക്കുന്ന മർദ്ദനമായിരുന്നുവെന്നും അന്ന് ഒരു കുട്ടിയായിരുന്ന താൻ വല്ലാതെ ഭയന്നുപോയെന്നും പാർവതി വെളിപ്പെടുത്തി.
റോഡിലൂടെ നടക്കുമ്പോൾ പുരുഷന്മാരുടെ കൈകളിലേക്ക് ശ്രദ്ധിക്കണമെന്ന് തന്റെ അമ്മ പറഞ്ഞുതരുമായിരുന്നു. ഒരു അമ്മ തന്റെ പെണ്കുട്ടിയെ ഇങ്ങനെ പറഞ്ഞുപഠിപ്പിക്കേണ്ട സാഹചര്യം ഒന്ന് ഓര്ത്തുനോക്കൂ
സ്ത്രീകൾ എപ്പോഴും സ്വന്തം സുരക്ഷയെക്കുറിച്ച് ആശങ്കപ്പെടേണ്ടി വരുന്ന സമൂഹത്തിൻ്റെ അവസ്ഥയിലേക്കാണ് പാർവതിയുടെ ഈ തുറന്നുപറച്ചിലുകൾ വിരൽ ചൂണ്ടുന്നത്. സോഷ്യൽ മീഡിയയിൽ വലിയ ചർച്ചകൾക്കാണ് ഈ വെളിപ്പെടുത്തലുകൾ വഴിയൊരുക്കിയിരിക്കുന്നത്.
ParvathyThiruvothu speak up Women Safety and Social Issue
