ന്യൂഡൽഹി: റിപ്പബ്ലിക് ദിനത്തിന്റെ ഭാഗമായി രാജ്യത്തെ പരമോന്നത ബഹുമതികളിൽ ഒന്നായ പദ്മഭൂഷൺ പുരസ്കാരം മലയാളത്തിന്റെ പ്രിയനടൻ മമ്മൂട്ടി ഏറ്റുവാങ്ങി. രാഷ്ട്രപതി ഭവനിൽ നടന്ന പ്രൗഢഗംഭീരമായ ചടങ്ങിൽ രാഷ്ട്രപതി ദ്രൗപതി മുർമുവിൽ നിന്നാണ് അദ്ദേഹം പുരസ്കാരം സ്വീകരിച്ചത്.
കേരളത്തിൽ നിന്നുള്ള പദ്മവിഭൂഷൺ ജേതാക്കളായ ജസ്റ്റിസ് കെ.ടി. തോമസ്, പി. നാരായണൻ എന്നിവരും ചടങ്ങിൽ ബഹുമതികൾ ഏറ്റുവാങ്ങി. മമ്മൂട്ടിക്കൊപ്പം പദ്മഭൂഷണ് അർഹനായ എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ, പ്രശസ്ത ഗായിക അൽക യാഗ്നിക് എന്നിവർക്കും രാഷ്ട്രപതി പുരസ്കാരങ്ങൾ സമ്മാനിച്ചു.
സദസ്സിന്റെ കൈയടിയോടെ ദുൽഖറും സുഹൃത്തുക്കളും
പുരസ്കാര ചടങ്ങിൽ പങ്കെടുക്കാനായി കഴിഞ്ഞ ദിവസമാണ് മമ്മൂട്ടി കുടുംബസമേതം ഡൽഹിയിൽ എത്തിയത്. മമ്മൂട്ടി പുരസ്കാരം ഏറ്റുവാങ്ങുന്ന അഭിമാന നിമിഷത്തിൽ, സദസ്സിലിരുന്ന് ആവേശത്തോടെ കൈയടിക്കുന്ന മകൻ ദുൽഖർ സൽമാന്റെ ദൃശ്യങ്ങൾ ഏറെ ശ്രദ്ധേയമായി.
പ്രധാനമന്ത്രി നരേന്ദ്ര മോദി, ലോക്സഭാ സ്പീക്കർ ഓം ബിർള, ആഭ്യന്തരമന്ത്രി അമിത് ഷാ എന്നിവരെ കൈകൂപ്പി അഭിവാദ്യം ചെയ്ത ശേഷമാണ് മമ്മൂട്ടി പുരസ്കാരം സ്വീകരിക്കാനായി രാഷ്ട്രപതിക്കരികിലേക്ക് നടന്നത്. മമ്മൂട്ടിയുടെ സന്തതസഹചാരിയും നിർമാതാവുമായ എസ്. ജോർജ്, നിർമാതാവ് ആന്റോ ജോസഫ് എന്നിവരും ചടങ്ങിന് സാക്ഷ്യം വഹിക്കാൻ സദസ്സിലുണ്ടായിരുന്നു.
28 വർഷത്തെ കാത്തിരിപ്പ്; തിളക്കമാർന്ന സിനിമാ ജീവിതം
1998-ൽ രാജ്യം മമ്മൂട്ടിയെ പദ്മശ്രീ നൽകി ആദരിച്ചിരുന്നു. അതിനുശേഷം 28 വർഷത്തെ നീണ്ട കാത്തിരിപ്പിനൊടുവിലാണ് പദ്മഭൂഷൺ ബഹുമതി അദ്ദേഹത്തെ തേടിയെത്തുന്നത്. കഴിഞ്ഞ വർഷത്തെ മികച്ച നടനുള്ള സംസ്ഥാന പുരസ്കാരം ഏറ്റുവാങ്ങുന്ന അതേ ദിവസം തന്നെയാണ് പദ്മഭൂഷൺ പ്രഖ്യാപന വാർത്തയും എത്തിയത് എന്നത് ഈ നേട്ടത്തിന് ഇരട്ടി മധുരമേകുന്നു.
മികച്ച നടനുള്ള മൂന്ന് ദേശീയ പുരസ്കാരങ്ങളും ഏഴ് തവണ മികച്ച നടനായതുൾപ്പെടെ 10 സംസ്ഥാന ചലച്ചിത്ര അവാർഡുകളും മമ്മൂട്ടി സ്വന്തമാക്കിയിട്ടുണ്ട്. മലയാളത്തിന് പുറമെ തമിഴ്, ഹിന്ദി, തെലുങ്ക്, കന്നഡ ഭാഷകളിലെല്ലാം വെള്ളിത്തിരയിലെത്തിയ അദ്ദേഹം ഇന്ത്യൻ സിനിമയിലെ തന്നെ തിളങ്ങുന്ന നക്ഷത്രമാണ്. പുതുതലമുറയിലെ പരീക്ഷണ ചിത്രങ്ങളിൽ പോലും അനിതരസാധാരണമായ അഭിനയമികവ് പുറത്തെടുത്ത് പ്രേക്ഷകരെ അത്ഭുതപ്പെടുത്തുന്നത് അദ്ദേഹം ഇന്നും തുടരുകയാണ്.
