“ഈ രണ്ടര മണിക്കൂർ എല്ലാ ഇമോഷനുകളിലൂടെയും കടന്നുപോയി, എവിടെയൊക്കെയോ കരഞ്ഞുപോയി”: മെന്റലിസ്റ്റ് ആദിയുടെ ഷോ കണ്ട് വികാരഭരിതയായി കാവ്യ മാധവൻ

പ്രശസ്ത മെന്റലിസ്റ്റ് ആദിയുടെ പെർഫോമൻസ് നേരിൽ കണ്ടതിന്റെ വൈകാരികമായ അനുഭവം പങ്കുവെച്ച് നടി കാവ്യ മാധവൻ. അമ്മ ശ്യാമളയ്ക്കും മകൾ മഹാലക്ഷ്മിക്കും (മാമാട്ടി) ഒപ്പമാണ് തമിഴ്നാട്ടിൽ വെച്ച് നടന്ന ആദിയുടെ ഷോ കാണാൻ കാവ്യ എത്തിയത്. ഗായിക കെ.എസ് ചിത്ര, ശിവാംഗി തുടങ്ങിയവരും ഷോ കാണാൻ എത്തിയിരുന്നു. ഫേസ്ബുക്ക് പോസ്റ്റിലൂടെയാണ് താരം ഈ അനുഭവം ആരാധകരുമായി പങ്കുവെച്ചത്.

ആദിയുടെ കരിയറിന്റെ തുടക്കം മുതലേയുള്ള യാത്രകൾ കണ്ട വ്യക്തിയെന്ന നിലയിൽ ഈ നേട്ടം ഏറെ സന്തോഷം നൽകുന്നുവെന്നും, വ്യക്തിപരമായി ഇത് തന്റെ കൂടി വിജയമായാണ് കാണുന്നതെന്നും കാവ്യ പറഞ്ഞു. സുഹൃത്തുക്കളും ബന്ധുക്കളുമെല്ലാം കണ്ടിട്ടും താൻ മാത്രമാണ് ആദ്യമായി ഈ ഷോ കാണുന്നതെന്നും കാവ്യ കൂട്ടിച്ചേർത്തു.

“ഈ രണ്ടര മണിക്കൂർ എല്ലാതരം ഇമോഷൻസിലൂടെയും ഞാൻ കടന്നുപോയി. ഞാൻ എവിടെയൊക്കെയോ കരഞ്ഞു. എന്റെ പഴയ കാലങ്ങൾ ഓർമ്മ വന്നു. ചിലയിടത്തൊക്കെ നഷ്ടബോധവും, ചിലയിടത്ത് ഭയങ്കര സന്തോഷവും തോന്നി,” കാവ്യ വ്യക്തമാക്കുന്നു.

ചെറിയ കുട്ടിയായതിനാൽ രണ്ടര മണിക്കൂർ നീളുന്ന ഷോയിൽ മകൾ മാമാട്ടി അടങ്ങിയിരിക്കുമോ എന്ന സംശയം തനിക്കുണ്ടായിരുന്നുവെന്നും, എന്നാൽ ഇതിനുമുൻപും ആദിയെ കണ്ട് പരിചയമുള്ള അവൾ ഷോ വളരെ നന്നായി ആസ്വദിച്ചത് വലിയ സന്തോഷം നൽകിയെന്നും കാവ്യ പറഞ്ഞു. സദസ്സ് ആദിക്കായി കയ്യടിക്കുമ്പോൾ ആ കയ്യടി തനിക്ക് കൂടി ലഭിക്കുന്നതുപോലെയാണ് തോന്നിയതെന്ന് പറഞ്ഞുകൊണ്ടാണ് കാവ്യ തന്റെ വാക്കുകൾ അവസാനിപ്പിക്കുന്നത്. കാവ്യയുടെ ഈ കുറിപ്പിന് താഴെ നിരവധി പേരാണ് സ്നേഹം അറിയിച്ചുകൊണ്ട് കമന്റുകളുമായി എത്തിയിരിക്കുന്നത്.

Kavya Madhavan Shares Her Touching Experience at Mentalist Aadhi’s Show