ഡാലസിൽ വെച്ച് ദാസേട്ടനെ നേരിൽ കണ്ട് ഔസേപ്പച്ചൻ; ചിത്രങ്ങൾ വൈറൽ

പ്രശസ്ത സംഗീത സംവിധായകൻ ഔസേപ്പച്ചനും ഗാനഗന്ധർവ്വൻ കെ.ജെ. യേശുദാസും വർഷങ്ങൾക്ക് ശേഷം നേരിൽ കണ്ടുമുട്ടി. അമേരിക്കയിലെ ഡാലസിലുള്ള യേശുദാസിന്റെ വസതിയിലെത്തിയാണ് ഔസേപ്പച്ചൻ അദ്ദേഹത്തെ സന്ദർശിച്ചത്. ഈ അമേരിക്കൻ യാത്രയിൽ ദാസേട്ടനെ നേരിൽ കാണുക എന്നത് തന്റെ വലിയ ആഗ്രഹമായിരുന്നുവെന്ന് ഔസേപ്പച്ചൻ സോഷ്യൽ മീഡിയയിൽ കുറിച്ചു.

“ഫോൺ വഴിയുള്ള ആശയവിനിമയം തുടരുന്നുണ്ടെങ്കിലും അദ്ദേഹത്തെ നേരിൽ കണ്ടിട്ട് വർഷങ്ങളായി. ദാസേട്ടനോടും കുടുംബത്തോടൊപ്പം മനോഹര നിമിഷങ്ങൾ പങ്കിടാൻ കഴിഞ്ഞതിൽ അതിയായ സന്തോഷം,” ഔസേപ്പച്ചൻ പറഞ്ഞു. ‘ഉണ്ണികളെ ഒരു കഥ പറയാം’, ‘ഓ പ്രിയേ’, ‘എന്നും നിന്നെ പൂജിക്കാം’ തുടങ്ങിയ നിരവധി ഹിറ്റ് ഗാനങ്ങൾ ഈ കോമ്പോ മലയാളികൾക്ക് സമ്മാനിച്ചിട്ടുണ്ട്. കോവിഡിന് ശേഷം അമേരിക്കയിൽ തന്നെ തുടരുന്ന യേശുദാസിന്റെ പുതിയ ചിത്രങ്ങൾ ആരാധകർ ആവേശത്തോടെയാണ് ഏറ്റെടുത്തിരിക്കുന്നത്.

Composer Ouseppachan Meets K.J. Yesudas in the USA