By admin 
ബിഗ് ബോസ് മലയാളം സീസൺ 7-ലൂടെ പ്രേക്ഷകരുടെ പ്രിയങ്കരികളായി മാറിയ താരങ്ങളാണ് ആദില, നൂറ, അനുമോൾ എന്നിവർ. ഷോയുടെ തുടക്കം മുതൽ തന്നെ പരസ്പരം മികച്ച പിന്തുണ നൽകിയ ഇവരുടെ മൂവർ സംഘത്തെ ആരാധകർ സ്നേഹപൂർവ്വം ‘പട്ടായ ഗേൾസ്’ എന്നായിരുന്നു വിളിച്ചിരുന്നത്. എന്നാൽ ഷോ ഗ്രാൻഡ് ഫിനാലെയോട് അടുത്ത സമയത്ത് ഇവർക്കിടയിൽ ചില പ്രശ്നങ്ങൾ ഉടലെടുക്കുകയും അനുമോൾക്കെതിരെ ചില ആരോപണങ്ങൾ ഉയരുകയും ചെയ്തത് ഈ കൂട്ടുക്കെട്ടിൽ വിള്ളൽ വീഴാൻ കാരണമായിരുന്നു.
ബിഗ് ബോസിന് ശേഷം മറ്റ് മത്സരാർത്ഥികൾ പല തവണ ഒത്തുകൂടിയപ്പോഴും ആദില-നൂറ-അനുമോൾ ഗ്യാങ്ങിനെ അവിടെയൊന്നും കാണാൻ കഴിഞ്ഞിരുന്നില്ല. ഇതോടെ ഇവരുടെ സൗഹൃദം അവസാനിച്ചു എന്ന തരത്തിലുള്ള വാർത്തകളും സോഷ്യൽ മീഡിയയിൽ സജീവമായി.
എന്നാൽ ഇപ്പോൾ എല്ലാ അഭ്യൂഹങ്ങൾക്കും വിരാമമിട്ട് മൂവരും വീണ്ടും ഒന്നിച്ചിരിക്കുകയാണ്. കഴിഞ്ഞ ദിവസം നടന്ന ഒരു ഉദ്ഘാടന വേദിയിലാണ് ഇവർ മൂവരും ഒത്തുചേർന്നത്. മുൻ ബിഗ് ബോസ് താരമായ ഷിയാസ് കരീമും ഇവർക്കൊപ്പമുണ്ടായിരുന്നു. ഷിയാസാണ് ഇവരുടെ ഒത്തുചേരലിന്റെ ചിത്രങ്ങൾ സമൂഹമാധ്യമങ്ങളിലൂടെ ആരാധകരുമായി പങ്കുവെച്ചത്.
ബിഗ് ബോസ് ഷോ അവസാനിച്ച് അഞ്ച് മാസങ്ങൾക്ക് ശേഷമാണ് ഇവർ ഒരേ ഫ്രെയിമിൽ വീണ്ടും ഒരുമിക്കുന്നത്. ഇതിന്റെ ചിത്രങ്ങൾ സോഷ്യൽ മീഡിയയിൽ ഇതിനോടകം വൈറലായിക്കഴിഞ്ഞു. “യഥാർത്ഥ സൗഹൃദം ഒരിക്കലും അവസാനിക്കില്ല” എന്ന് പറഞ്ഞുകൊണ്ടാണ് ആരാധകർ ഇവരുടെ പുനസ്സമാഗമം ആഘോഷിക്കുന്നത്. പരസ്പരമുള്ള പിണക്കങ്ങൾ മറന്ന് തങ്ങളുടെ പ്രിയ താരങ്ങൾ വീണ്ടും ഒന്നിച്ചതിന്റെ സന്തോഷത്തിലാണ് ഇപ്പോൾ ആരാധകർ.
Bigg Boss Malayalam 7’s ‘Pattaya Girls’ Reunite Adhila Noora Anumol