തമിഴ് സൂപ്പർതാരം അജിത് കുമാറും നടി നയൻതാരയും ഭർത്താവ് വിഘ്നേഷ് ശിവനും തമ്മിലുള്ള കൂടിക്കാഴ്ചയുടെ ദൃശ്യങ്ങൾ സോഷ്യൽ മീഡിയയിൽ വൈറലാകുന്നു. ദുബായിൽ നടക്കുന്ന 24H ദുബായ് സീരീസ് കാറോട്ട മത്സരത്തിൽ പങ്കെടുക്കുന്ന അജിത്തിനെ കാണാനും പ്രോത്സാഹിപ്പിക്കാനുമാണ് നയൻതാരയും വിഘ്നേഷും എത്തിയത്.
റേസിംഗ് സർക്യൂട്ടിൽ വെച്ച് അജിത്ത് ഇരുവരുമായി സൗഹൃദ സംഭാഷണം നടത്തുന്ന ദൃശ്യങ്ങളാണ് പുറത്തുവന്നിരിക്കുന്നത്. മുൻപ് വിഘ്നേഷ് ശിവൻ സംവിധാനം ചെയ്യാനിരുന്ന അജിത് ചിത്രം (AK62) മുടങ്ങിയതിനെ തുടർന്ന് ഇവർക്കിടയിൽ അസ്വാരസ്യങ്ങൾ ഉണ്ടെന്ന തരത്തിൽ അഭ്യൂഹങ്ങൾ പ്രചരിച്ചിരുന്നു. എന്നാൽ, അജിത്തും വിഘ്നേഷും പരസ്പരം ആലിംഗനം ചെയ്യുന്നതും സ്നേഹത്തോടെ സംസാരിക്കുന്നതും ഈ അഭ്യൂഹങ്ങൾക്കുള്ള മറുപടിയാണെന്ന് ആരാധകർ പറയുന്നു.
മത്സരത്തിൽ അജിത്തിന്റെ പ്രകടനം കാണാൻ സംഗീത സംവിധായകൻ ജി.വി. പ്രകാശും നടൻ സിബി സത്യരാജും എത്തിയിരുന്നു. റേസിംഗിനോടുള്ള അജിത്തിന്റെ അർപ്പണബോധത്തെ പ്രശംസിച്ച് സിബി സത്യരാജ് സോഷ്യൽ മീഡിയയിൽ കുറിപ്പും പങ്കുവെച്ചിട്ടുണ്ട്. എ.എൽ വിജയ് സംവിധാനം ചെയ്യുന്ന അജിത്തിന്റെ റേസിംഗ് ജീവിതത്തെക്കുറിച്ചുള്ള 90 മിനിറ്റ് ഡോക്യുമെന്ററിയിലും ഈ മത്സരങ്ങൾ ഉൾപ്പെടുത്തുമെന്നാണ് വിവരം.
യുവാക്കൾക്ക് തങ്ങളുടെ സ്വപ്നങ്ങൾ പിന്തുടരാൻ പ്രചോദനം നൽകുന്നതാണ് അജിത്തിന്റെ ഈ റേസിംഗ് യാത്രയെന്ന് അണിയറപ്രവർത്തകർ വ്യക്തമാക്കുന്നു.
Ajith Nayanthara latest news viral video
