ക്വാറന്റൈന് കാലം ഫലപ്രദമായി എങ്ങനെ ചെലവഴിക്കാം എന്ന ആലോചനയിലാണ് എല്ലാവരും. കുടുംബത്തിനും പ്രിയപ്പെട്ടവര്ക്കുമൊപ്പം സമയം ചെലവഴിക്കുകയാണ് സിനിമാതാരങ്ങള് ഉള്പ്പടെയുള്ളവര്. വീണുകിട്ടിയ ദിവസങ്ങള് ഒരവധിക്കാലം പോലെ ചെലവഴിക്കുകയാണ് നടി കീര്ത്തി സുരേഷ്. ഈസ്റ്റര് ദിനത്തില് തന്റെ വളര്ത്തുനായ നൈക്കിനൊപ്പം സൂര്യാസ്തമയം കാണുന്ന ചിത്രം ആരാധകര്ക്കായി പങ്കുവയ്ക്കുകയാണ് താരം.
സമൂഹമാദ്ധ്യമങ്ങള് ചര്ച്ച ചെയ്ത ഒന്നായിരുന്നു കീര്ത്തി സുരേഷിന്റെ വിവാഹവാര്ത്ത. കീര്ത്തിയും ഒരു വ്യവസായിയും തമ്മില് വിവാഹിതരാവുന്നു എന്നതായിരുന്നു ഗോസിപ്പ് കോളങ്ങള് ആഘോഷിച്ച വാര്ത്തകളില് ഒന്ന്. വാര്ത്ത തെറ്റാണെന്നും തല്ക്കാലം വിവാഹം കഴിക്കാനുള്ള പ്ലാന് തനിക്കില്ലെന്നും തുറന്നുപറഞ്ഞ് ഒടുവില് കീര്ത്തി തന്നെ രംഗത്തെത്തിയിരുന്നു.
ലോക്ഡൗണ് ആരംഭിക്കും മുന്പ് നാഗേഷ് കുകുനൂരിന്റെ ‘ഗുഡ് ലക്ക് സഖി’യില് അഭിനയിച്ചുവരികയായിരുന്നു കീര്ത്തി. ചിത്രത്തില് ഒരു ഷാര്പ്പ് ഷൂട്ടറുടെ വേഷത്തിലാണ് കീര്ത്തി എത്തുന്നത്. 2020 പകുതിയോടെ തിയേറ്ററില് എത്താന് ഒരുങ്ങുന്ന ചിത്രം നിര്മിക്കുന്നത് ദില് രാജുവാണ്.
മലയാളത്തില് ‘മരക്കാര് അറബിക്കടലിന്റെ സിംഹം’ ആണ് കീര്ത്തിയുടേതായി തിയേറ്ററില് എത്താനുള്ള ചിത്രം. മാര്ച്ച് അവസാന ആഴ്ച തിയേറ്ററില് എത്താനിരുന്ന ചിത്രം കൊറോണയുടെ പശ്ചാത്തലത്തില് റിലീസ് നീട്ടുകയായിരുന്നു. മോഹന്ലാലിനെ കേന്ദ്രകഥാപാത്രമാക്കി പ്രിയദര്ശന് സംവിധാനം ചെയ്യുന്ന ചിത്രത്തില് ആര്ച്ച എന്ന കഥാപാത്രത്തെയാണ് കീര്ത്തി അവതരിപ്പിക്കുന്നത്. താരസമ്പന്നമായ ചിത്രത്തില് കീര്ത്തിയ്ക്ക് ഒപ്പം കളിക്കൂട്ടുകാരായ പ്രണവ് മോഹന്ലാല്, കല്യാണി പ്രിയദര്ശന് എന്നിവരുമുണ്ട്.
