മുംബൈയെ വീഴ്ത്തി പഞ്ചാബിൻ്റെ പഞ്ച്; ജയം ഒമ്പത് വിക്കറ്റിന്

നിലവിലെ ചാമ്പ്യൻമാരായ മുംബൈ ഇന്ത്യൻസിനെ തകർത്ത് പഞ്ചാബ് കിംഗ്സ് വിജയവഴിയിൽ തിരിച്ചെത്തി. പഞ്ചാബ് ഒമ്പത് വിക്കറ്റിനാണ് മുംബൈയെ വീഴ്ത്തിയത്. മുംബൈയെ 131 ൽ എറിഞ്ഞൊതുക്കിയ പഞ്ചാബ് 14 പന്തുകൾ ബാക്കിനിൽക്കെ വിജയലക്ഷ്യം മറികടന്നു. അർദ്ധ സെഞ്ച്വറിയുമായി തിളങ്ങിയ നായകൻ കെ എൽ രാഹുലാണ് പഞ്ചാബിന് വിജയം ഒരുക്കിയത്.

സ്കോർ:മുംബൈ: 131/6പഞ്ചാബ്: 131/1 (17.4)

ടോസ് നേടി മുംബൈയെ ബാറ്റിംഗിനയച്ച കെ എൽ രാഹുലിൻ്റെ തീരുമാനം ശരിവയ്ക്കുന്ന തരത്തിലായിരുന്നു പഞ്ചാബ് ബൗളർമാരുടെ പ്രകടനം. വിക്കറ്റ് വീഴ്ത്തുന്നതിനേക്കാൾ റൺസ് വിട്ടുകൊടുക്കാതിരിക്കുന്ന കാര്യത്തിൽ ബൗളർമാർ മിടുക്ക് കാട്ടി. ആദ്യ ഏഴ് ഓവറിൽ ഒരു ബൗണ്ടറി മാത്രമാണ് മുംബൈയ്ക്ക് നേടാനായത്. ആദ്യ സിക്സ് പിറന്നത് പത്താം ഓവറിലും! 12 ഓവർ വരെ ആറിൽ താഴെയായിരുന്നു റൺറേറ്റ്. നായകൻ രോഹിത് ശർമ്മയും സൂര്യകുമാർ യാദവും ക്രീസിലുണ്ടായിട്ടും സ്കോറിംഗിന് വേഗം കൂട്ടാനായില്ല. 13-ാം ഓവർ മുതലാണ് സ്കോറിംഗിന് അൽപമെങ്കിലും വേഗം വന്നത്. രോഹിത് ശർമ്മയുടെ ഇന്നിംഗ്സാണ് മുതൽക്കൂട്ടായത്. രോഹിത് 52 പന്തിൽ 63 റൺസെടുത്തു. സൂര്യകുമാർ യാദവ് 33(27) റൺസെടുത്തു. പഞ്ചാബിനായി രവി ബിഷ്ണോയ്, മുഹമ്മദ് ഷമി എന്നിവർ രണ്ട് വിക്കറ്റ് വീതം വീഴ്ത്തി.
മറുപടി ബാറ്റിംഗിനിറങ്ങിയ പഞ്ചാബിനായി കെ എൽ രാഹുലും മായങ്ക് അഗർവാളും മികച്ച തുടക്കം നൽകി. ആദ്യ വിക്കറ്റിൽ ഇരുവരും ചേർന്ന് 53 റൺസ് ചേർത്തു. 25(20)  റൺസെടുത്താണ് മായങ്ക് പുറത്തായത്. പിന്നീടെത്തിയ ക്രിസ് ഗെയ്ൽ രാഹുലിന് മികച്ച പിന്തുണ നൽകി. കരുതലോടെ കളിച്ച ഇരുവരും ചേർന്ന് പഞ്ചാബിനെ വിജയതീരത്ത് എത്തിച്ചു. രാഹുൽ 60(52)ഉം ഗെയ്ൽ 43(35)ഉം റൺസെടുത്ത് പുറത്താകാതെ നിന്നു.

English Summary :Punjab’s beats Mumbai; Win by nine wickets