By admin കൊച്ചി: എറണാകുളം കരിമുകളിൽനിന്ന് കഴിഞ്ഞ മൂന്ന് ദിവസമായി കാണാതായ 14 വയസ്സുകാരിയെ കണ്ടെത്തി. എറണാകുളം നോർത്ത് റെയിൽവേ സ്റ്റേഷൻ പരിസരത്തുനിന്നാണ് പെൺകുട്ടിയെ സുരക്ഷിതയായി കണ്ടെത്തിയത്.
കഴിഞ്ഞ 28-ാം തീയതി രാത്രി 10:30 ഓടെയാണ് പെൺകുട്ടി വീട്ടിൽനിന്ന് ഇറങ്ങിപ്പോയത്. കയ്യിൽ ഒരു ബാഗുമായി പെൺകുട്ടി പോകുന്നത് കരിമുകൾ ജംഗ്ഷനിലെ സിസിടിവി ദൃശ്യങ്ങളിൽ പതിഞ്ഞിരുന്നു. ഫോൺ ഉപയോഗിക്കുന്നതുമായി ബന്ധപ്പെട്ട് വീട്ടിലുണ്ടായ ചെറിയ പിണക്കമാണ് കുട്ടി വീട് വിട്ടിറങ്ങാൻ കാരണമെന്നാണ് പ്രാഥമിക വിവരം.
പോലീസ് അന്വേഷണം ഊർജിതമാക്കിയതോടെയാണ് നോർത്ത് റെയിൽവേ സ്റ്റേഷൻ പരിസരത്തുനിന്ന് കുട്ടിയെ കണ്ടെത്താൻ സാധിച്ചത്. ഈ മൂന്ന് ദിവസങ്ങളിൽ കുട്ടി എവിടെയായിരുന്നു എന്നതിനെക്കുറിച്ച് പോലീസ് അന്വേഷണം നടത്തിവരികയാണ്. കുട്ടിയെ കോടതിയിൽ ഹാജരാക്കിയ ശേഷം ബന്ധുക്കൾക്കൊപ്പം വിട്ടയക്കും. ആവശ്യമായ കൗൺസിലിംഗ് ഉൾപ്പെടെയുള്ള നടപടികൾ സ്വീകരിക്കുമെന്നും അധികൃതർ അറിയിച്ചു. മൂന്ന് ദിവസത്തെ ആശങ്കയ്ക്ക് ശേഷം കുട്ടിയെ കണ്ടെത്തിയത് കുടുംബാംഗങ്ങൾക്കും നാട്ടുകാർക്കും വലിയ ആശ്വാസമായി.
