സുൽത്താൻ ബത്തേരി: കെഎസ്ആർടിസിയിലെ പെൻഷൻ മുടങ്ങിയതിനെ തുടർന്ന് സംസ്ഥാനത്ത് രണ്ടു പേർ കൂടി ജീവനൊടുക്കി. കെഎസ്ആർടിസി തിരുവനന്തപുരം നേമം സ്വദേശി കരുണാകരൻ നാടാരുo ബത്തേരി ഡിപ്പോയിലെ മുൻ സൂപ്രണ്ട് നടേശ് ബാബുവുമാണ് ജീവനൊടുക്കിയത്. തലശേരി സ്വദേശിയായ നടേശ് ബാബുവിനെ ബത്തേരിയിലെ ഒരു ലോഡ്ജിലാണ് മരിച്ച നിലയിൽ കണ്ടെത്തിയത്. ഇവിടെനിന്നും ആത്മഹത്യാക്കുറിപ്പ് കണ്ടെത്തുകയും ചെയ്തു.
പെൻഷൻ ലഭിക്കാത്തതിനെ തുടർന്ന് കഴിഞ്ഞ രണ്ടാം തീയതി വിഷം കഴിച്ച് ജീവനൊടുക്കാൻ ശ്രമിച്ച കരുണാകരൻ നാടാർ ആശുപത്രിയിൽ ചികിത്സയിലിരിക്കുന്നതിനിടെ ബുധനാഴ്ച രാത്രിയിലാണ് മരിച്ചത്. ഇതോടെ എൽഡിഎഫ് സർക്കാർ അധികാരത്തിൽ വന്നശേഷം കെഎസ്ആർടിസിയിൽ പെൻഷൻ മുടങ്ങിയതിനെ തുടർന്ന് ജീവനൊടുക്കിയവരുടെ എണ്ണം 15 ആയി.
കെഎസ്ആർടിസി പ്രതിസന്ധിയിൽ മുഖ്യമന്ത്രി പിണറായി വിജയൻ ഇന്ന് വൈകിട്ട് എട്ടിന് തിരുവനന്തപുര അടിയന്തര യോഗം വിളിച്ചു. ഗതാഗതമന്ത്രിയും ഉന്നത ഉദ്യോഗസ്ഥരും യോഗത്തിൽ പങ്കെടുക്കും.
കെഎസ്ആർടിസി പെൻഷൻകാർ ജീവനൊടുക്കിയതിൽ ഒന്നാം പ്രതി സർക്കാരാണെന്ന് പ്രതിപക്ഷ നേതാവ് രമേശ് ചെന്നിത്തല ആരോപിച്ചു.
