തിരുവനന്തപുരം: സംസ്ഥാന സര്‍ക്കാര്‍ പ്രഖ്യാപിച്ച സൗജന്യ റേഷന്‍ ഇന്ന് മുതല്‍ വിതരണം ചെയ്തു തുടങ്ങും. 20നകം വിതരണം പൂര്‍ത്തിയാക്കും. ഇതിനു പിന്നാലെ കേന്ദ്ര സര്‍ക്കാര്‍ പ്രഖ്യാപിച്ച ഭക്ഷ്യധാന്യവും വിതരണംചെയ്യും. 87 ലക്ഷം കുടുംബങ്ങള്‍ക്ക് സംസ്ഥാന സര്‍ക്കാര്‍ പ്രഖ്യാപിച്ച സൗജന്യ ഭക്ഷ്യധാന്യ കിറ്റ് നല്‍കും. ഇതിന്റെ വിതരണം ഏഴ് ദിവസത്തിനുള്ളില്‍ ആരംഭിക്കും. എഎവൈ കാര്‍ഡുടമകള്‍ക്കും വീടുകളില്‍ നിരീക്ഷണത്തില്‍ കഴിയുന്നവര്‍ക്കും ട്രാന്‍സ്ജന്‍ഡര്‍ വിഭാഗങ്ങള്‍ക്കുമാണ് ആദ്യം കിറ്റ് നല്‍കുക.
തിരക്കൊഴിവാക്കാന്‍ ഉച്ചവരെ മുന്‍ഗണനാ വിഭാഗങ്ങള്‍ക്കും ഉച്ചയ്ക്കുശേഷം മുന്‍ഗണനേതര വിഭാഗങ്ങള്‍ക്കുമായി വിതരണം ക്രമീകരിച്ചിട്ടുണ്ട്. ഒരു സമയം അഞ്ചുപേരില്‍ കൂടുതല്‍ റേഷന്‍കടയ്ക്കു മുന്നില്‍ നില്‍ക്കാന്‍ പാടില്ല. സുരക്ഷാ മാനദണ്ഡങ്ങള്‍ കര്‍ശനമായി പാലിക്കണം. എല്ലാ റേഷന്‍ കടകളിലും മാസ്‌കുകള്‍ വിതരണം ചെയ്തിട്ടുണ്ട്. റേഷന്‍കടയില്‍ നേരിട്ടെത്താന്‍ കഴിയാത്തവര്‍ക്ക് സന്നദ്ധ പ്രവര്‍ത്തകര്‍വഴി വീടുകളിലെത്തിക്കും. സപ്ലൈകോയുടെ 56 ഡിപ്പോയുടെ കീഴില്‍ ഭക്ഷ്യധാന്യ കിറ്റ് തയ്യാറാക്കിവരികയാണെന്നും മന്ത്രി അറിയിച്ചു.