By admin 
തിരുവനന്തപുരം: കേരളത്തിൽ പ്രഖ്യാപിത വൈദ്യുതി നിയന്ത്രണം ഏർപ്പെടുത്താൻ കെഎസ്ഇബി തീരുമാനിച്ചു. പീക്ക് ലോഡ് മാനേജ്മെന്റിന്റെ ഭാഗമായി സംസ്ഥാനത്തിന്റെ വിവിധ ഭാഗങ്ങളിൽ 15 മിനിറ്റ് മുതൽ അര മണിക്കൂർ വരെ വൈദ്യുതി നിയന്ത്രണം ഉണ്ടാകുമെന്ന് അധികൃതർ അറിയിച്ചു.
സംസ്ഥാനത്ത് കടുത്ത ചൂട് അനുഭവപ്പെടുന്ന സാഹചര്യത്തിൽ വൈദ്യുതി ഉപയോഗം ക്രമാതീതമായി വർധിച്ചതാണ് ഇത്തരമൊരു നടപടിയിലേക്ക് ബോർഡിനെ നയിച്ചത്. വൈദ്യുതി ഉപയോഗം ഏറ്റവും കൂടുതലുള്ള വൈകുന്നേരം 6 മണി മുതൽ രാത്രി 11 മണി വരെയുള്ള സമയത്തായിരിക്കും നിയന്ത്രണം ഏർപ്പെടുത്തുക. ലോഡ് കൂടുന്നതിനനുസരിച്ച് പ്രാദേശിക അടിസ്ഥാനത്തിലായിരിക്കും നിയന്ത്രണം നടപ്പിലാക്കുക.
വൈദ്യുതി മുടങ്ങുന്ന സാഹചര്യങ്ങളിൽ സാധ്യമായ ഇടങ്ങളിൽ ഉപഭോക്താക്കളെ എസ്എംഎസ് വഴി മുൻകൂട്ടി അറിയിക്കുമെന്നും കെഎസ്ഇബി വ്യക്തമാക്കി. അപ്രഖ്യാപിത ലോഡ്ഷെഡിംഗിനെതിരെ വിവിധയിടങ്ങളിൽ പ്രതിഷേധം ശക്തമായ പശ്ചാത്തലത്തിലാണ് നിയന്ത്രണം ഔദ്യോഗികമായി നടപ്പിലാക്കാൻ തീരുമാനിച്ചത്. കടുത്ത പ്രതിസന്ധി ഒഴിവാക്കാൻ ജനങ്ങൾ സഹകരിക്കണമെന്നും ബോർഡ് അഭ്യർത്ഥിച്ചു.