By admin 
കൊച്ചി: മലയാളത്തിന്റെ പ്രിയ താരം മോഹൻലാലിന്റെ മാതാവ് ശാന്തകുമാരി (90) അന്തരിച്ചു. വാർധക്യസഹജമായ അസുഖങ്ങളെത്തുടർന്ന് ചികിത്സയിലായിരുന്നു. കൊച്ചി എളമക്കരയിലെ ‘വിശ്വശാന്തി’ വസതിയിലായിരുന്നു അന്ത്യം.
ദീർഘകാലമായി വാർധക്യസഹജമായ ബുദ്ധിമുട്ടുകൾ അനുഭവിച്ചിരുന്ന ശാന്തകുമാരി അമ്മ, മകൻ മോഹൻലാലിനൊപ്പമാണ് കൊച്ചിയിൽ താമസിച്ചിരുന്നത്. അമ്മയുടെ ആരോഗ്യനില മോശമായതിനെത്തുടർന്ന് മോഹൻലാൽ തന്റെ പല സിനിമകളുടെയും ചിത്രീകരണങ്ങൾ മാറ്റി വെച്ച് അമ്മയ്ക്കൊപ്പം സമയം ചെലവഴിച്ചിരുന്നു.
തിരുവനന്തപുരം സ്വദേശിനിയായ ശാന്തകുമാരി, പരേതനായ വിശ്വനാഥൻ നായരുടെ പത്നിയാണ്. പരേതനായ പ്യാരേലാൽ മറ്റൊരു മകനാണ്. ലാലേട്ടന്റെ ജീവിതത്തിലും സിനിമയിലേക്കുള്ള വളർച്ചയിലും വലിയ പിന്തുണ നൽകിയ വ്യക്തിയായിരുന്നു അമ്മ. മകന്റെ ഓരോ നേട്ടത്തിലും അഭിമാനത്തോടെ കൂടെ നിന്ന ശാന്തകുമാരി അമ്മയുടെ വിയോഗം സിനിമാ ലോകത്തിന് ഒന്നടങ്കം നോവാകുകയാണ്.
സംസ്കാരം സംബന്ധിച്ച വിവരങ്ങൾ പിന്നീട് അറിയിക്കും. സിനിമാ-സാംസ്കാരിക-രാഷ്ട്രീയ രംഗത്തെ പ്രമുഖർ വസതിയിലെത്തി ആദരാഞ്ജലികൾ അർപ്പിക്കുന്നു.