ചേർത്തല: പ്രശസ്ത നടനും സംവിധായകനുമായ വിഷ്ണു ഗോവിന്ദൻ വിവാഹിതനായി. അഞ്ജലി ഗീതയാണ് വധു. ചേർത്തല സബ് റജിസ്ട്രാർ ഓഫിസിൽ വച്ച് നടന്ന ലളിതമായ ചടങ്ങിൽ അടുത്ത ബന്ധുക്കളും സുഹൃത്തുക്കളും മാത്രമാണ് പങ്കെടുത്തത്.
വിവാഹത്തിന്റെ രസകരമായ നിമിഷങ്ങൾ ഉൾക്കൊള്ളിച്ച ഒരു വിഡിയോ വിഷ്ണുവും അഞ്ജലിയും സോഷ്യൽ മീഡിയയിൽ പങ്കുവച്ചു. ‘വെറും സ്നേഹം, കലഹങ്ങളൊന്നുമില്ല-രണ്ട് ഹൃദയങ്ങൾ, ഒരു ഒപ്പ്, ഒപ്പം മാതാപിതാക്കളും അരികിൽ’ എന്നാണ് വിഡിയോയ്ക്ക് ഒപ്പം ഇരുവരും കുറിച്ചത്. വിവാഹ ഫോട്ടോകളും വിഡിയോയും പുറത്തുവന്നതിന് പിന്നാലെ നിരവധി ആരാധകരും സിനിമാ താരങ്ങളും ആശംസകളുമായി രംഗത്തെത്തി. ടൊവിനോ തോമസ്, നീരജ് മാധവ്, അനുമോൾ, അശ്വിൻ കുമാർ, ഗണപതി തുടങ്ങിയവർ നവദമ്പതികൾക്ക് ആശംസകൾ നേർന്നു.
2017ൽ ‘ഒരു മെക്സിക്കൻ അപാരത’ എന്ന ചിത്രത്തിലൂടെ അഭിനയ രംഗത്ത് തുടക്കം കുറിച്ച വിഷ്ണു, അതേ വർഷം ‘ഹിസ്റ്ററി ഓഫ് ജോയ്’ എന്ന ചിത്രത്തിന്റെ സംവിധായകനായി മലയാള സിനിമയിൽ തന്റെ സാന്നിധ്യം അറിയിച്ചിരുന്നു.
നവദമ്പതികൾക്ക് ആശംസകൾ നേർന്ന് ആരാധകർ സോഷ്യൽ മീഡിയയിൽ സജീവമാണ്.
