വിവാഹമോചന വാർത്തകൾക്കിടെ തൃഷയ്ക്കൊപ്പം വിവാഹ ചടങ്ങിലെത്തി വിജയ്; വീഡിയോ വൈറൽ

ചെന്നൈ: തമിഴ് സൂപ്പർതാരം വിജയ് ഭാര്യ സംഗീതയുമായി വിവാഹമോചനത്തിന് ഒരുങ്ങുന്നു എന്ന വാർത്തകൾക്ക് പിന്നാലെ, താരം നടി തൃഷയ്‌ക്കൊപ്പം പൊതുചടങ്ങിൽ പങ്കെടുത്തത് സോഷ്യൽ മീഡിയയിൽ ചർച്ചയാകുന്നു. എജിഎസ് എന്റർടൈൻമെന്റ്‌സ് ഉടമ കൽപാത്തി സുരേഷിന്റെ മകന്റെ വിവാഹ സൽക്കാരത്തിനാണ് വിജയും തൃഷയും ഒന്നിച്ചെത്തിയത്.

ചെന്നൈയിൽ നടന്ന ചടങ്ങിൽ ഇരുവരും ഒരേ നിറത്തിലുള്ള വസ്ത്രങ്ങൾ (Twining) ധരിച്ചാണ് എത്തിയത് എന്നതും ശ്രദ്ധേയമായി. വിജയ് ബീജ് നിറത്തിലുള്ള ഷർട്ടും മുണ്ടും ധരിച്ചപ്പോൾ, സമാനമായ നിറത്തിലുള്ള സാരിയായിരുന്നു തൃഷയുടെ വേഷം. ചടങ്ങിൽ ഉടനീളം ഇരുവരും ഒപ്പമുണ്ടായിരുന്നു. നവദമ്പതികൾക്ക് പൂച്ചെണ്ട് നൽകി ആശംസകൾ അറിയിച്ച ശേഷമാണ് ഇരുവരും മടങ്ങിയത്.

കഴിഞ്ഞ ദിവസമാണ് വിജയ്‌ക്കെതിരെ ഭാര്യ സംഗീത ചെന്നൈയിലെ കുടുംബ കോടതിയിൽ വിവാഹമോചന ഹർജി നൽകിയത്. വിജയ്ക്ക് മറ്റൊരു നടിയുമായി അവിഹിത ബന്ധമുണ്ടെന്നും ഇത് കുടുംബജീവിതത്തിൽ വലിയ വിള്ളലുകൾ ഉണ്ടാക്കിയെന്നും ഹർജിയിൽ ആരോപിക്കുന്നു. 2021 മുതൽ വിജയ് കുടുംബത്തിൽ നിന്ന് അകന്നു കഴിയുകയാണെന്നും സംഗീത ആരോപിച്ചിരുന്നു.

വർഷങ്ങളായി തമിഴ് സിനിമയിലെ പ്രിയപ്പെട്ട ജോഡികളാണ് വിജയും തൃഷയും. ‘ഗില്ലി’ മുതൽ ‘ലിയോ’ വരെ നീളുന്ന ഇവരുടെ ഓൺസ്ക്രീൻ കെമിസ്ട്രിക്ക് വലിയ ആരാധകവൃന്ദമുണ്ട്. വിവാഹമോചന വാർത്തകൾക്കിടയിലും ഇരുവരും പൊതുവേദിയിൽ ഒന്നിച്ചെത്തിയത് തമിഴ് സിനിമാ ലോകത്ത് വലിയ ചർച്ചകൾക്ക് വഴിവെച്ചിരിക്കുകയാണ്.

രാഷ്ട്രീയ പ്രവേശനം പ്രഖ്യാപിച്ച വിജയ്‌യുടെ പുതിയ പാർട്ടി ‘തമിഴക വെട്രി കഴകം’ (TVK) 2026-ലെ നിയമസഭാ തിരഞ്ഞെടുപ്പിൽ മത്സരിക്കാനിരിക്കെയാണ് ഈ വിവാദങ്ങൾ പുറത്തുവരുന്നത്.