തെന്നിന്ത്യൻ താരം തല അജിത് കുമാറും കുടുംബവും ഇപ്പോൾ ഫ്രാൻസിലാണ്. അജിത്തിന്റെ സ്വന്തം റേസിങ് ടീമായ ‘അജിത് കുമാർ റേസിങ്’ അന്താരാഷ്ട്ര തലത്തിൽ ചരിത്രപരമായ ഒരു നേട്ടം സ്വന്തമാക്കിയതിന്റെ സന്തോഷത്തിലാണ് കുടുംബം. ഇപ്പോഴിതാ ഫ്രാൻസിൽ നിന്നുള്ള മനോഹരമായ കുടുംബചിത്രങ്ങൾ പങ്കുവെച്ചിരിക്കുകയാണ് അജിത്തിന്റെ ഭാര്യയും നടിയുമായ ശാലിനി.
“കുറച്ചു ഫ്രാൻസും, ഒരുപാടു സ്നേഹവും” (A little bit of France, a whole lot of love!) എന്ന മനോഹരമായ അടിക്കുറിപ്പോടെയാണ് ശാലിനി ഇൻസ്റ്റാഗ്രാമിൽ ചിത്രങ്ങൾ പോസ്റ്റ് ചെയ്തത്. റേസിങ് ട്രാക്കിലെ തിരക്കുകൾക്കിടയിലും കുടുംബത്തോടൊപ്പം സന്തോഷം പങ്കിടുന്ന അജിത്തിനെ ചിത്രങ്ങളിൽ കാണാം.
ലോകപ്രശസ്തമായ ’24 ഹവേഴ്സ് ഓഫ് ലേ മാൻസ്’ (24 Hours of Le Mans) സഹിഷ്ണുത റേസിങ് ടൂർണമെന്റിൽ പങ്കെടുക്കുന്ന ആദ്യ ഇന്ത്യൻ ടീം എന്ന ചരിത്രനേട്ടമാണ് ‘അജിത് കുമാർ റേസിങ്’ സ്വന്തമാക്കിയത്. ആകെ 62 കാറുകൾ മത്സരിച്ച കടുത്ത പോരാട്ടത്തിൽ അജിത്തിന്റെ ടീമിന്റെ രണ്ട് കാറുകളും മികച്ച പ്രകടനമാണ് കാഴ്ചവെച്ചത്. ഇതിൽ കാർ നമ്പർ 36 ഒട്ടാകെ 13-ാം സ്ഥാനത്തും (P13), കാർ നമ്പർ 16 സ്വന്തം ക്ലാസിൽ 9-ാം സ്ഥാനത്തും (P9) ഫിനിഷ് ചെയ്തു. അരങ്ങേറ്റ മത്സരത്തിൽ തന്നെ ലോകവേദിയിൽ ആദ്യ പത്തിൽ ഇടംനേടാൻ കഴിഞ്ഞത് ഇന്ത്യൻ മോട്ടോർ സ്പോർട്സ് രംഗത്തിന് തന്നെ വലിയൊരു നാഴികക്കല്ലാണ്.
അതേസമയം, അജിത് കുമാറിന്റെ റേസിങ് ജീവിതത്തെയും കഠിനാധ്വാനത്തെയും കുറിച്ച് പ്രശസ്ത സംവിധായകൻ എ.എൽ. വിജയ് ഒരു ഡോക്യുമെന്ററി സിനിമ ഒരുക്കുന്നുണ്ട്. ലേ മാൻസിലെ ഈ ചരിത്ര നിമിഷങ്ങൾ ക്യാമറയിൽ പകർത്താൻ തന്നെ ക്ഷണിച്ചതിന് സംവിധായകൻ വിജയ് അജിത്തിന് നന്ദി അറിയിച്ചു. യുവാക്കൾക്ക് വലിയൊരു പ്രചോദനമാകുന്ന രീതിയിൽ ഒരുങ്ങുന്ന ഈ ഡോക്യുമെന്ററി ഫിലിമിന് ഏകദേശം 90 മിനിറ്റ് ദൈർഘ്യമുണ്ടായിരിക്കുമെന്നാണ് തമിഴ് സിനിമാ ലോകത്ത് നിന്നുള്ള റിപ്പോർട്ടുകൾ.
Shalini Ajithkumar latest family photos from France
