തമിഴ് സൂപ്പർതാരം അജിത്ത് കുമാറിന് ഹൃദ്യമായ ജന്മദിനാശംസകൾ നേർന്ന് ഇന്ത്യൻ ബാഡ്മിന്റൺ താരം പി.വി. സിന്ധു. തൻ്റെ സോഷ്യൽ മീഡിയ അക്കൗണ്ടിലൂടെയാണ് സിന്ധു പ്രിയപ്പെട്ട ‘അജിത്ത് അണ്ണന്’ ആശംസകൾ അറിയിച്ചത്. ഇരുവരും തമ്മിലുള്ള അടുത്ത സൗഹൃദം വ്യക്തമാക്കുന്ന ഈ പോസ്റ്റ് ഇതിനോടകം തന്നെ ആരാധകർ ഏറ്റെടുത്ത് കഴിഞ്ഞു.
“എന്നെ എപ്പോഴും സ്നേഹത്തോടെ ‘അനിയത്തീ’ എന്ന് വിളിക്കുന്ന ഞങ്ങളുടെ പ്രിയപ്പെട്ട അജിത്ത് അണ്ണന് ഹൃദയം നിറഞ്ഞ ജന്മദിനാശംസകൾ” എന്ന് കുറിച്ചുകൊണ്ടാണ് സിന്ധു കുറിപ്പ് പങ്കുവെച്ചത്. രസകരമായ ചില കാര്യങ്ങളും സിന്ധു ഇതിൽ ഉൾപ്പെടുത്തിയിട്ടുണ്ട്. ദത്തയെ കൂടുതൽ ബൈക്ക് ഓടിക്കാനോ അവൻ്റെ ഇഷ്ടങ്ങൾക്ക് പിന്നാലെ പോകാനോ ദയവായി പ്രേരിപ്പിക്കരുത് എന്ന് തമാശരൂപേണ സിന്ധു അജിത്തിനോട് പറയുന്നുണ്ട്.
കാറോട്ട മത്സരങ്ങളോടുള്ള അജിത്തിൻ്റെ വലിയ താല്പര്യത്തെക്കുറിച്ചും സിന്ധു തൻ്റെ കുറിപ്പിൽ പരാമർശിച്ചു. പ്രശസ്തമായ ‘ലെ മാൻസ്’ (Le Mans) മോട്ടോർ റേസിൽ പങ്കെടുക്കണമെന്ന അജിത്തിൻ്റെ വലിയ സ്വപ്നത്തിന് പിന്നാലെ സഞ്ചരിക്കാൻ ഈ വർഷവും അദ്ദേഹത്തിന് കഴിയട്ടെ എന്ന് അവർ ആശംസിച്ചു.
തനിക്ക് നൽകുന്ന വലിയ പിന്തുണയെക്കുറിച്ചും സിന്ധു വാചാലയായി. “എന്ത് തന്നെയായാലും എൻ്റെ മനസ്സ് പറയുന്നത് കേൾക്കാനും എൻ്റെ പാഷന് പിന്നാലെ പോകാനും അണ്ണൻ എപ്പോഴും എന്നെ ഓർമ്മിപ്പിക്കാറുണ്ട്. അതിന് ഒരുപാട് നന്ദി. നമുക്ക് ഉടനെ സംസാരിക്കാം,” സിന്ധു തൻ്റെ കുറിപ്പ് അവസാനിപ്പിച്ചു. സിനിമയ്ക്ക് പുറമെ ബൈക്ക്, കാർ റേസിംഗുകളിൽ വലിയ കമ്പമുള്ള അജിത്തിന് കായിക താരങ്ങൾക്കിടയിലും വലിയ സൗഹൃദങ്ങളുണ്ടെന്ന് തെളിയിക്കുന്നതാണ് പി.വി. സിന്ധുവിൻ്റെ ഈ പിറന്നാൾ സന്ദേശം.
P.V. Sindhu extends birthday wishes to actor Ajith
