24 വർഷത്തെ ഇടവേളയ്ക്ക് ശേഷം മിനിസ്ക്രീനിലേക്ക് അവതാരികയായി തിരിച്ചെത്തി ബോളിവുഡിന്റെ പ്രിയതാരം മാധുരി ദീക്ഷിത്. പ്രശസ്ത ക്വിസ് ഷോയായ ‘കോൻ ഹോനാർ ക്രോർപതി’ (Kon Honar Crorepati) യുടെ പുതിയ സീസണിലൂടെയാണ് താരം അവതാരകയുടെ റോളിലേക്ക് വീണ്ടും എത്തുന്നത്. ജനപ്രിയ റിയാലിറ്റി ഷോയായ ‘കോൻ ബനേഗ ക്രോർപതി’യുടെ മറാഠി പതിപ്പാണ് ഇത്.
പച്ചയും സ്വർണ്ണനിറവുമുള്ള സാരിയിൽ തിളങ്ങി താരം
സോഷ്യൽ മീഡിയയിലൂടെ പുറത്തുവിട്ട ഷോയുടെ ആദ്യ പ്രൊമോ വീഡിയോയിൽ മനോഹരമായ ഗ്രീൻ ആൻഡ് ഗോൾഡ് സാരി അണിഞ്ഞാണ് മാധുരി പ്രത്യക്ഷപ്പെടുന്നത്. ‘ആതാ ഖേൽ ബദൽനാർ’ (ഇനി കളി മാറും) എന്ന പ്രമേയവുമായാണ് ഷോയുടെ പുതിയ പതിപ്പ് എത്തുന്നത്. സോണി മറാഠിയിലും സോണി ലിവിലും (Sony LIV) ഷോ ഉടൻ സംപ്രേഷണം ആരംഭിക്കും.
2002-ൽ സംപ്രേഷണം ചെയ്ത ‘കഹിൻ നാ കഹിൻ കോയി ഹൈ’ എന്ന മാച്ച് മേക്കിംഗ് റിയാലിറ്റി ഷോയിലായിരുന്നു മാധുരി അവസാനമായി അവതാരികയായി എത്തിയത്. അതിനുശേഷം ‘ജലക് ദിഖ്ലാ ജാ’, ‘ഡാൻസ് ദീവാനെ’ തുടങ്ങിയ ജനപ്രിയ ഡാൻസ് റിയാലിറ്റി ഷോകളിൽ വിധികർത്താവായി പ്രത്യക്ഷപ്പെട്ടിട്ടുണ്ടെങ്കിലും, രണ്ട് പതിറ്റാണ്ടിലേറെ നീണ്ട ഇടവേളയ്ക്ക് ശേഷമാണ് ഒരു പരിപാടിയുടെ പൂർണ്ണ ചുമതലയുള്ള അവതാരകയായി താരം വീണ്ടും എത്തുന്നത്.
“അറിവിലൂടെയും നിശ്ചയദാർഢ്യത്തിലൂടെയും ജനങ്ങളെ പ്രചോദിപ്പിക്കുന്ന ഒരു ഷോയുടെ ഭാഗമാകാൻ കഴിഞ്ഞതിൽ എനിക്ക് വലിയ സന്തോഷമുണ്ട്. എന്നെ സംബന്ധിച്ചിടത്തോളം ഇത് വെറുമൊരു ക്വിസ് ഷോ മാത്രമല്ല; ജനങ്ങളുടെ ആഗ്രഹങ്ങളെയും സ്വപ്നങ്ങളെയും പ്രതീക്ഷകളെയും ആഘോഷിക്കുന്ന വേദിയാണ്. ഒരു മറാഠി വംശജ എന്ന നിലയിൽ മത്സരാർത്ഥികളുടെ അനുഭവങ്ങളും സ്വപ്നങ്ങളും അടുത്തറിയാൻ ഞാൻ കാത്തിരിക്കുന്നു.”
— മാധുരി ദീക്ഷിത്
നേരത്തെ സച്ചിൻ ഖെഡേക്കർ, സ്വപ്നിൽ ജോഷി, നാഗരാജ് മഞ്ജുളെ തുടങ്ങിയ പ്രമുഖരായിരുന്നു ‘കോൻ ഹോനാർ ക്രോർപതി’യുടെ മുൻ സീസണുകൾ നയിച്ചിരുന്നത്. എന്നാൽ ഈ ക്വിസ് ഷോയുടെ ചരിത്രത്തിൽ ആദ്യമായാണ് ഒരു വനിതാ അവതാരക എത്തുന്നതെന്ന പ്രത്യേകതയും ഈ പുതിയ സീസണിനുണ്ട്.
