നടനും രാഷ്ട്രീയപ്രവർത്തകനുമായ കൃഷ്ണകുമാറിന്റെ ഏറ്റവും ഇളയ മകൾ ഹൻസിക കൃഷ്ണ ബിരുദപഠനം പൂർത്തിയാക്കി. ഉന്നത മാർക്കോടെ (എ പ്ലസ് ഗ്രേഡ്) വിജയം വരിച്ച സന്തോഷം പങ്കുവെക്കുന്നതിനൊപ്പം, തന്റെ മൂന്ന് വർഷത്തെ കോളേജ് ജീവിതത്തെക്കുറിച്ചുള്ള ഒരു ഹൃദ്യമായ കുറിപ്പും ഹൻസിക സോഷ്യൽ മീഡിയയിൽ പങ്കുവെച്ചിട്ടുണ്ട്. ബിരുദദാന ചടങ്ങിൽ നിന്നുള്ള മനോഹരമായ ചിത്രങ്ങൾക്കൊപ്പമാണ് താരത്തിന്റെ ഇൻസ്റ്റാഗ്രാം പോസ്റ്റ്.
കോളേജ് ജീവിതം തനിക്ക് നൽകിയ നല്ല ഓർമ്മകളെയും ഒപ്പം നേരിടേണ്ടി വന്ന കയ്പേറിയ അനുഭവങ്ങളെയും കുറിച്ച് ഹൻസിക കുറിപ്പിൽ തുറന്നുപറയുന്നുണ്ട്.
“ഔദ്യോഗികമായി ഞാൻ ബിരുദധാരിയായിരിക്കുകയാണ്, അതും എ പ്ലസ് ഗ്രേഡോടെ! കഴിഞ്ഞ 3 വർഷത്തെ എന്റെ കോളേജ് ജീവിതം തിരിഞ്ഞുനോക്കുമ്പോൾ ഒരുപാട് ഓർമ്മകളാണ് മനസ്സിലേക്ക് വരുന്നത്. ചില സൗഹൃദങ്ങൾ തകർന്നു, ചില വഞ്ചനകൾ നേരിടേണ്ടി വന്നു. അത് എന്നെ ഒരുപാട് കരയിപ്പിച്ചു. പക്ഷേ, അതിനെയെല്ലാം അതിജീവിച്ച് കൂടുതൽ ശക്തയായി മുന്നോട്ട് പോകാൻ എനിക്ക് സാധിച്ചു. നല്ലവരായ കുറച്ചു സുഹൃത്തുക്കളെയും എനിക്ക് ഈ യാത്രയിൽ ലഭിച്ചു,” ഹൻസിക കുറിച്ചു.
പഠനകാലത്ത് തന്നെ പൂർണ്ണമായി പിന്തുണച്ച അധ്യാപകർക്കും കുടുംബത്തിനും ഹൻസിക നന്ദി രേഖപ്പെടുത്തിയിട്ടുണ്ട്. സോഷ്യൽ മീഡിയയിൽ ഏറെ സജീവമായ ഹൻസികയ്ക്ക് ലക്ഷക്കണക്കിന് ഫോളോവേഴ്സ് ഉള്ള ഒരു യൂട്യൂബ് ചാനലുമുണ്ട്. ഹൻസികയുടെ പുതിയ നേട്ടത്തിൽ ആശംസകൾ നേർന്നുകൊണ്ട് ചേച്ചിമാരായ അഹാന, ദിയ, ഇഷാനി എന്നിവരും ആരാധകരും രംഗത്തെത്തിയിട്ടുണ്ട്.
Hansika Krishna Graduates with ‘A+’ Grade
