By admin 
റോക്കിംഗ് സ്റ്റാർ യാഷ് നായകനാകുന്ന ബ്രഹ്മാണ്ഡ ചിത്രം ‘ടോക്സിക്’ (Toxic: A Fairytale for Grown-Ups) സംവിധായിക ഗീതു മോഹൻദാസിന്റെ ജന്മദിനത്തിൽ സർപ്രൈസ് വീഡിയോയുമായി അണിയറപ്രവർത്തകർ. സിനിമയുടെ ലൊക്കേഷനിൽ നിന്നുള്ള ആവേശം നിറഞ്ഞ ബിഹൈൻഡ് ദി സീൻ (BTS) ദൃശ്യങ്ങളാണ് അണിയറപ്രവർത്തകർ പുറത്തുവിട്ടിരിക്കുന്നത്.
വലിയ ആക്ഷൻ രംഗങ്ങളും ഷൂട്ടുകളും ഗീതു മോഹൻദാസ് എന്ന സംവിധായിക എത്രത്തോളം പവർഫുൾ ആയാണ് നിയന്ത്രിക്കുന്നത് എന്ന് വ്യക്തമാക്കുന്നതാണ് ഈ 1 മിനിറ്റ് വീഡിയോ.
“മനസ്സിൽ തറച്ച ഓരോ ദൃശ്യത്തിന് പിന്നിലും, സംഭാഷണങ്ങളേക്കാൾ കൂടുതൽ കാര്യങ്ങൾ സംസാരിച്ച ഓരോ നിശ്ശബ്ദതയ്ക്ക് പിന്നിലും അവളുണ്ടായിരുന്നു! ഹാപ്പി ബർത്ത്ഡേ ഗീതു മോഹൻദാസ്…” എന്ന ക്യാപ്ഷനോടെയാണ് ചിത്രത്തിന്റെ നിർമ്മാതാക്കളായ കെ.വി.എൻ പ്രൊഡക്ഷൻസ് വീഡിയോ പങ്കുവെച്ചത്.
ചിത്രത്തിൽ പ്രധാന വേഷത്തിലെത്തുന്ന ബോളിവുഡ് താരം കിയാര അദ്വാനിയും ഗീതുവിന് ആശംസകളുമായി എത്തിയിട്ടുണ്ട്. ഗീതു മോഹൻദാസിനെ ‘ക്യാപ്റ്റൻ ഓഫ് ദി ഷിപ്പ്’ എന്ന് വിശേഷിപ്പിച്ച കിയാര, ഭയമില്ലാത്ത കാഴ്ചപ്പാടും അടങ്ങാത്ത ആവേശവുമുള്ള പ്രതിഭയാണ് ഗീതുവെന്നും ഇൻസ്റ്റാഗ്രാമിൽ കുറിച്ചു.
കെജിഎഫ് 2-വിന് ശേഷം യാഷ് നായകനാകുന്ന ചിത്രം എന്ന നിലയിൽ വലിയ പ്രതീക്ഷയോടെയാണ് സിനിമാലോകം ‘ടോക്സിക്കിനായി’ കാത്തിരിക്കുന്നത്. നയൻതാര, കിയാര അദ്വാനി, ഹുമ ഖുറേഷി തുടങ്ങി വൻ താരനിരയാണ് ചിത്രത്തിലുള്ളത്.
Geethumohandas birthday toxic movie