നടൻ നന്ദമുരി ബാലകൃഷ്ണയുടെ പുതിയ വിഡിയോ സമൂഹമാധ്യമങ്ങളിൽ തരംഗമാവുന്നു. താൻ നായകനാകുന്ന ബിഗ് ബഡ്ജറ്റ് ചിത്രം ‘അഖണ്ഡ 2’ ന്റെ ട്രെയിലർ ലോഞ്ചിനിടെ സ്വന്തം പ്രകടനം സ്ക്രീനിൽ കണ്ട് അത്ഭുതപ്പെട്ട് ആവേശം കൊള്ളുന്ന വിഡിയോയാണ് വൈറലായത്.
ചിത്രത്തിന്റെ ട്രെയിലറിലെ ഡയലോഗുകൾക്കും മാസ് രംഗങ്ങൾക്കുമനുസരിച്ച് തലയാട്ടി ആസ്വദിക്കുകയായിരുന്ന താരം ഒരു നിമിഷം അമ്പരപ്പോടെ ആർത്തുവിളിക്കുന്നതും വിഡിയോയിൽ കാണാം. സമീപത്ത് മലയാളി താരം സംയുക്ത മേനോനും ഉണ്ടായിരുന്നു.
ബോയപതി ശ്രീനു സംവിധാനം ചെയ്യുന്ന ബ്രഹ്മാണ്ഡ ചിത്രമാണ് ‘അഖണ്ഡ 2: താണ്ഡവം’. 2021ൽ പുറത്തിറങ്ങിയ ‘അഖണ്ഡ’ സിനിമയുടെ രണ്ടാം ഭാഗമാണിത്. ബോയപതിയും നന്ദമുരി ബാലകൃഷ്ണയും ഒന്നിക്കുന്ന നാലാമത്തെ ചിത്രമാണിത്. മലയാളത്തിൽ നിന്നും സംയുക്ത മേനോൻ നായികയായി എത്തുന്ന ചിത്രത്തിൽ ആദി പിന്നിസെട്ടി വില്ലൻ വേഷത്തിലെത്തുന്നു. വൻ ബഡ്ജറ്റിൽ ഒരുക്കുന്ന ഈ പാൻ ഇന്ത്യൻ ചിത്രം ഡിസംബർ 5ന് തിയറ്ററുകളിലെത്തും.
