By admin 
വനമേഖലകളിലെയും വനാതിർത്തിക്കുള്ളിലെയും ട്രൈബൽ സ്കൂളുകളിൽ പഠിക്കുന്ന കുട്ടികൾക്ക് പഠനസാമഗ്രികൾ എത്തിച്ചു നൽകുന്ന ജി. വേണുഗോപാൽ ഫൗണ്ടേഷന്റെ ‘സസ്നേഹം വിദ്യാമൃതം’ പദ്ധതിയുടെ മൂന്നാം ഘട്ടം വിജയകരമായി പൂർത്തിയായി. ഇക്കഴിഞ്ഞ ജൂൺ 2-ന് വിതുര വനാതിർത്തിക്കുള്ളിലെ തലത്തൂതക്കാവ് ട്രൈബൽ എൽ.പി. സ്കൂളിലാണ് ഇത്തവണ പഠനോപകരണ വിതരണം നടന്നത്.
വനത്തിനുള്ളിലെ സെറ്റിൽമെന്റിൽ നിന്നുള്ള ഇരുപത്തഞ്ച് കുട്ടികളാണ് ഈ സ്കൂളിൽ പഠിക്കുന്നത്. ഹെഡ്മാസ്റ്റർ ബിജു ജോൺ, മറ്റ് രണ്ട് അധ്യാപകർ, ഊരുമൂപ്പൻ ശശിധരൻ എന്നിവരുടെ സാന്നിധ്യത്തിൽ സ്കൂളിലെ മുഴുവൻ കുട്ടികൾക്കും പഠനോപകരണങ്ങൾ വിതരണം ചെയ്തു. അടിസ്ഥാന സൗകര്യങ്ങളുടെ കുറവുകളുണ്ടെങ്കിലും കാട്ടിനുള്ളിൽ താമസിക്കുന്ന ഈ കൊച്ചുകുട്ടികളുടെ അതിജീവന പാടവവും പ്രകൃതിയെ അറിഞ്ഞുള്ള ജീവിതവും ഏറെ അത്ഭുതപ്പെടുത്തുന്നതാണെന്ന് ഗായകൻ ജി. വേണുഗോപാൽ തന്റെ സോഷ്യൽ മീഡിയയിൽ കുറിച്ചു. ചക്ക സീസണിൽ സ്ഥിരമായി ആനകൾ വന്ന് മതിൽ തകർക്കാറുള്ള ഈ സ്കൂൾ പരിസരത്ത്, മഴ നനഞ്ഞ് കുട്ടികൾ ഫൗണ്ടേഷൻ സമ്മാനിച്ച വർണ്ണക്കുടകൾ ചൂടി ഉത്സാഹത്തോടെ നിൽക്കുന്ന ചിത്രം ഏറെ ഹൃദ്യമായിരുന്നു.
കഴിഞ്ഞ വർഷങ്ങളിൽ കോട്ടൂർ വനമേഖലയിലെ വ്ളാവെട്ടി എൽ.പി. സ്കൂൾ, അമ്പൂരി വനത്തിനുള്ളിലെ പുരവിമല എൽ.പി. സ്കൂൾ എന്നിവിടങ്ങളിലാണ് ഈ പദ്ധതി നടപ്പിലാക്കിയത്. മൂന്ന് വർഷമായി തങ്ങളോടൊപ്പം ഈ കാരുണ്യപ്രവർത്തിയിൽ പങ്കാളികളായ എല്ലാ അഭ്യുദയകാംക്ഷികൾക്കും ജി. വേണുഗോപാൽ നന്ദി അറിയിച്ചു.
G. Venugopal Foundation Brings Smiles to Tribal School Children with ‘Sasneham Vidyamritham-3