ടാറ്റ പഞ്ച് ഇവി ഫെയ്‌സ്‌ലിഫ്റ്റ് ഇന്ത്യയിൽ അവതരിപ്പിച്ചു; വില 9.69 ലക്ഷം രൂപ മുതൽ, 468 കിലോമീറ്റർ റേഞ്ച്!

ടാറ്റ മോട്ടോഴ്സ് തങ്ങളുടെ ജനപ്രിയ ഇലക്ട്രിക് മൈക്രോ എസ്‌യുവിയായ ടാറ്റ പഞ്ച് ഇവിയുടെ (Tata Punch EV) പുതിയ ഫെയ്‌സ്‌ലിഫ്റ്റ് പതിപ്പ് ഇന്ത്യൻ വിപണിയിൽ അവതരിപ്പിച്ചു. 9.69 ലക്ഷം രൂപയാണ് (എക്സ്-ഷോറൂം) വാഹനത്തിന്റെ പ്രാരംഭ വില. പുതിയ രൂപമാറ്റങ്ങൾക്ക് പുറമെ കൂടുതൽ മികച്ച റേഞ്ചും ഫീച്ചറുകളുമായാണ് വാഹനം വിപണിയിലെത്തിയിരിക്കുന്നത്.

ഉപഭോക്താക്കൾക്ക് കൂടുതൽ ആശ്വാസമേകിക്കൊണ്ട് ബാറ്ററി-ആസ്-എ-സർവീസ് (BaaS) സ്കീം വഴിയും പഞ്ച് ഇവി സ്വന്തമാക്കാം. ഈ പദ്ധതി പ്രകാരം 6.49 ലക്ഷം രൂപ മുതൽ വാഹനം വാങ്ങാനാകും (കിലോമീറ്ററിന് 2.6 രൂപ മുതൽ 2.9 രൂപ വരെ ബാറ്ററി വാടക നൽകണം).

ബാറ്ററിയും റേഞ്ചും: രണ്ട് ലിഥിയം അയൺ (LFP) ബാറ്ററി പാക്ക് ഓപ്ഷനുകളിലാണ് പുതിയ പഞ്ച് ഇവി ഫെയ്‌സ്‌ലിഫ്റ്റ് വരുന്നത്.

• 30kWh (മീഡിയം റേഞ്ച്): ഒറ്റ ചാർജിൽ 365 കിലോമീറ്റർ ARAI റേഞ്ച് കമ്പനി വാഗ്ദാനം ചെയ്യുന്നു. സ്മാർട്ട്, സ്മാർട്ട്+ എന്നീ വകഭേദങ്ങളിൽ ഇത് ലഭ്യമാണ്.
• 40kWh (ലോങ് റേഞ്ച്): ഒറ്റ ചാർജിൽ 468 കിലോമീറ്റർ (ARAI) റേഞ്ച് നൽകുന്നു. യഥാർത്ഥ സാഹചര്യങ്ങളിൽ (Real-world) 355 കിലോമീറ്റർ വരെ റേഞ്ച് ലഭിക്കുമെന്നാണ് കമ്പനിയുടെ അവകാശവാദം. 129bhp കരുത്ത് ഉത്പാദിപ്പിക്കുന്ന ഇലക്ട്രിക് മോട്ടോറാണ് ഇതിലുള്ളത്. 0-ൽ നിന്ന് 100 കിലോമീറ്റർ വേഗത കൈവരിക്കാൻ വെറും 9 സെക്കൻഡിൽ താഴെ മാത്രം മതി.

രണ്ട് ബാറ്ററി പാക്കുകളും 65kW DC ഫാസ്റ്റ് ചാർജിംഗ് സപ്പോർട്ട് ചെയ്യുന്നുണ്ട്. ഇത് ഉപയോഗിച്ച് വെറും 26 മിനിറ്റിനുള്ളിൽ 20% മുതൽ 80% വരെ ചാർജ് ചെയ്യാം. കൂടാതെ 15 മിനിറ്റ് ചാർജ് ചെയ്താൽ 135 കിലോമീറ്റർ ദൂരം സഞ്ചരിക്കാനും സാധിക്കും.

ഡിസൈനിലെയും ഫീച്ചറുകളിലെയും മാറ്റങ്ങൾ: പുതുക്കിയ ക്ലോസ്ഡ്-ഓഫ് ഗ്രിൽ, പുതിയ ബമ്പറുകൾ, 16 ഇഞ്ച് എയറോ ഡൈനാമിക് അലോയ് വീലുകൾ, പുതിയ എൽഇഡി ലൈറ്റിംഗ്, കണക്റ്റഡ് എൽഇഡി ടെയിൽ ലൈറ്റുകൾ എന്നിവയാണ് എക്സ്റ്റീരിയറിലെ പ്രധാന മാറ്റങ്ങൾ.

അകത്ത് ഡ്യുവൽ 10.25-ഇഞ്ച് സ്ക്രീനുകൾ (ഇൻഫോടെയ്ൻമെൻ്റ് സിസ്റ്റത്തിനും ഡിജിറ്റൽ ഡ്രൈവർ ഡിസ്പ്ലേയക്കും വേണ്ടി), വെന്റിലേറ്റഡ് ഫ്രണ്ട് സീറ്റുകൾ, സൺറൂഫ്, ആംബിയൻ്റ് ലൈറ്റിംഗ്, 360 ഡിഗ്രി ക്യാമറ, കണക്റ്റഡ് കാർ സാങ്കേതികവിദ്യ എന്നിവ ഉൾപ്പെടുത്തിയിട്ടുണ്ട്.

സുരക്ഷ: ആറ് എയർബാഗുകൾ, ഇലക്ട്രോണിക് സ്റ്റെബിലിറ്റി കൺട്രോൾ (ESC), ടയർ പ്രഷർ മോണിറ്ററിംഗ് സിസ്റ്റം (TPMS), ഹിൽ-ഹോൾഡ് അസിസ്റ്റ്, ഹൈ ബീം അസിസ്റ്റ്, കുട്ടികൾക്കായുള്ള ISOFIX സീറ്റ് ആങ്കറുകൾ എന്നിവ എല്ലാ വകഭേദങ്ങളിലും സ്റ്റാൻഡേർഡായി നൽകിയിരിക്കുന്നു.

ഫിയർലെസ് യെല്ലോ, ബംഗാൾ റൂജ്, കാരമൽ, എംപവേർഡ് ഓക്സൈഡ്, പ്യുവർ ഗ്രേ, പ്രിസ്റ്റിൻ വൈറ്റ് എന്നീ 6 ആകർഷകമായ നിറങ്ങളിൽ പുതിയ ടാറ്റ പഞ്ച് ഇവി ഫെയ്‌സ്‌ലിഫ്റ്റ് സ്വന്തമാക്കാം.