കൊച്ചി: മലയാള സിനിമയിലെ പ്രശസ്ത നടനും മിമിക്രി കലാകാരനുമായ കലാഭവൻ നവാസ് (51) ഹൃദയാഘാതത്തെ തുടർന്ന് അന്തരിച്ചു. ‘പ്രകമ്പനം’ എന്ന ചിത്രത്തിന്റെ ചിത്രീകരണം പൂർത്തിയാക്കി ചോറ്റാനിക്കരയിലെ ഹോട്ടൽ മുറിയിൽ വിശ്രമിക്കവെയാണ് അദ്ദേഹത്തെ മരിച്ച നിലയിൽ കണ്ടെത്തിയത്.
ചിത്രീകരണത്തിന്റെ അവസാന ഷെഡ്യൂൾ പൂർത്തിയാക്കി ഹോട്ടൽ മുറി വെക്കേറ്റ് ചെയ്യാനായാനെത്തിയ നവാസിനെ, ഏറെനേരം കഴിഞ്ഞിട്ടും കാണാത്തതിനെ തുടർന്ന് റൂം ബോയ് അന്വേഷിച്ചപ്പോഴാണ് മുറിയിൽ മരിച്ചുകിടക്കുന്നതായി കണ്ടത്. ഉടൻ പൊലീസ് സ്ഥലത്തെത്തി, മൃതദേഹം ചോറ്റാനിക്കരയിലെ സ്വകാര്യ ആശുപത്രിയിലേക്ക് മാറ്റി. ഹൃദയാഘാതമാണ് മരണകാരണമെന്ന് നവാസിന്റെ അടുത്ത സുഹൃത്തും മിമിക്രി കലാകാരനുമായ കെ.എസ്. പ്രസാദ് സ്ഥിരീകരിച്ചു.
ഇടവേളയ്ക്ക് ശേഷം സിനിമയിൽ സജീവമായി തിരിച്ചുവരവ് നടത്തുകയായിരുന്നു നവാസ്. മലയാള ചലച്ചിത്ര രംഗത്തെ പ്രമുഖ നടൻ അബൂബക്കറിന്റെ മകനായ നവാസിന്റെ ഭാര്യ നടി രഹനയാണ്.
നവാസിന്റെ അപ്രതീക്ഷിത വിയോഗം മലയാള സിനിമാ ലോകത്ത് ഞെട്ടലുണ്ടാക്കിയിട്ടുണ്ട്.
