നരേന്ദ്ര മോദി വീണ്ടും തിയേറ്ററുകളിലേയ്ക്ക്

ന്യൂഡല്‍ഹി: കോവിഡ് 19 നെത്തുടര്‍ന്ന് കുറെ മാസങ്ങളായി തിയേറ്ററുകള്‍ അടഞ്ഞുകിടക്കുകയാണ്. ലോക്ക് ഡൗണ്‍ ഇളവുകളുടെ സാഹചര്യത്തില്‍ തിയേറ്ററുകള്‍ തുറക്കാമെന്ന് കഴിഞ്ഞാഴ്ച കേന്ദ്ര സര്‍ക്കാര്‍ അറിയിച്ചിരുന്നു. ഒട്ടേറെ സിനിമകളാണ് തിയേറ്ററുകള്‍ തുറക്കുന്നതും കാത്തിരിക്കുന്നത്. ഇന്ത്യന്‍ പ്രധാനമന്ത്രി നരേന്ദ്ര മോദിയുടെ ജീവിത കഥ പറയുന്ന സിനിമയാണ് ആദ്യം തിയേറ്ററിലെത്തുകയെന്നതാണ് വാര്‍ത്ത. പി എം നരേന്ദ്ര മോദി എന്ന ചിത്രമാണ് ആദ്യം റിലീസ് ചെയ്യുക.  15ന് ആണ് ചിത്രം റിറിലീസ് ചെയ്യുക. വിവേക് ഒബ്‌റോയ് ആണ് ചിത്രത്തില്‍ നരേന്ദ്ര മോദിയായി അഭിനയിച്ചത്. മേയ് 24ന് ആയിരുന്നു ചിത്രം ആദ്യം റിലീസ് ചെയ്തത്. ഇപ്പോള്‍ വീണ്ടും ചിത്രം റിലീസ് ചെയ്യുന്നുവെന്നതാണ് വാര്‍ത്ത. എട്ട് കോടി ബജറ്റില്‍ നിര്‍മിച്ച ചിത്രം നേടിയത് 14.70 കോടിയായിരുന്നു. ഒമംഗ് കുമാര്‍ ആണ് ചിത്രം സംവിധാനം ചെയ്തത്. അനിരുദ്ധ ചൌളയും വിവേക് ഒബ്‌റോയിയും ചേര്‍ന്നാണ് തിരക്കഥ എഴുതിയത്. അടല്‍ ബിഹാരി വാജ്‌പെയ് അടക്കമുള്ള ബിജെപി നേതാക്കള്‍ ചിത്രത്തില്‍ കഥാപാത്രങ്ങളായി എത്തുന്നുണ്ട്. നരേന്ദ്ര മോദിയായിട്ടുള്ള വിവേക് ഒബ്‌റോയിയുടെ രൂപമാറ്റം ഏറെ ചര്‍ച്ചയായിരുന്നു.