പ്രദീപ് എം നായർ എന്ന നവാഗതസംവിധായകന്‍റെ പൃഥ്വിരാജ് ചിത്രമാണ്‌ വിമാനം. ബധിരനും മൂകനുമായ തൊടുപുഴക്കാരൻ സജി തോമസിന്റെ ജീവിതത്തിൽ നിന്നും പ്രേരണ ഉൾക്കൊണ്ടാണ് വിമാനം എന്ന ചിത്രം രൂപംകൊണ്ടത്.
പൃഥ്വിരാജ് അവതരിപ്പിക്കുന്ന വെങ്കിടി’ എന്ന യുവാവിന്റെ സ്വപ്നങ്ങളുടെയും തീവ്രപ്രണയത്തിന്റെയും കഥയാണ് വിമാനം. അസംസ്കൃത വസ്തുക്കളും മറ്റ് വാഹനങ്ങളുടെ പാർട്സും ഉപയോഗിച്ച് ‘ട്വിൻ–സീറ്റർ അൾട്രാ ലൈറ്റ് വിമാനം’ ഉണ്ടാക്കാനും അതില്‍ പറക്കാനും ആഗ്രഹിക്കുന്ന വൈകല്യങ്ങളുളള ചെറുപ്പക്കാരനാണ് വെങ്കിടി. വെങ്കിടിക്ക് എല്ലാത്തിനും കൂട്ടായി അമ്മാവനും അലൻസിയറും ഒപ്പമുണ്ട്. സുധീർ കരമന ആണ് വെങ്കിടിയുടെ അമ്മാവനായി എത്തുന്നത്. വെങ്കിടിക്ക് എല്ലാത്തിനും പ്രേരണയും പ്രചോദനവും നൽകി പ്രണയിനി ജാനകിയും ഒപ്പമുണ്ട്.
വിമാനം പറത്തുന്നതിനുള്ള ആഗ്രഹവും ജാനകിയോടുള്ള തീവ്രപ്രണയവും ചിത്രത്തിൽ ഒരുപോലെ ചാലിച്ചെടുക്കാൻ സംവിധായകൻ പ്രദീപ് എം നായർക്ക് കഴിഞ്ഞിട്ടുണ്ട്. തന്റെ സ്വപ്നങ്ങൾക്ക് കൂട്ടുനിൽക്കുന്ന പ്രണയിനിക്കൊപ്പം പറക്കണമെന്ന ആഗ്രഹം മാത്രം നടക്കാതെ പോയ വെങ്കിടിയുടെ ഓർമകളിലൂടെയാണ് കഥ പുരോഗമിക്കുന്നത്.
വെങ്കിടിയായി മികച്ച പ്രകടനമാണ് പൃഥ്വിരാജ് കാഴ്ചവച്ചിരിക്കുന്നത്.
ജാനകിയായി എത്തിയ ദുർഗാ കൃഷ്ണയും സുധീർ കരമനയും അലൻസിയറും തങ്ങളുടെ കഥാപാത്രങ്ങൾ മികവുറ്റതാക്കി. ഇവരെക്കുടാതെ ലെന, അശോകൻ, സൈജു കുറുപ്പ്, മേജർ രവി എന്നിവരും ചെറു കഥാപാത്രങ്ങളിലെത്തുന്നു.
ഷെഹ്നാദ് ജലാൽ ആണ് വിമാനത്തിന്റെ ഛായാഗ്രഹണം നിർവഹിച്ചത്. മാജിക് ഫ്രെയിംസിന്റെ ബാനറിൽ ലിസ്റ്റിൻ സ്റ്റീഫൻ നിർമാണം. ഗോപീ സുന്ദര്‍ ഗാനങ്ങൾക്ക് ഈണം പകർന്നിരിക്കുന്നു.
പൃഥ്വിരാജന്‍റെ കരിയറിലെ ഒരു വേറിട്ട ചിത്രമാണ്‌ വിമാനം.